添馬艦新政府總部大樓工程開展得如火如荼，早排本報報道過，以「門常開」為設計主題嘅新大樓會喺今日「上樑」，不過唔少風水師都話今日係破日，上樑唔吉利喎﹗可能特區政府畀我哋點醒咗，決定將工程押後，聞說改咗喺十月第一個星期做。

 

新大樓嘅東翼同西翼已經成幢矗立咗喺添馬艦，只差頂部橫樑就構成一個「門」字。尋日我哋再打探時發現，原來工程已經靜悄悄押後咗，聞說工程押後到十月初進行，為免影響交通，多數都係星期日做，換言之即是十月三日或者十日做。

 

不過我哋再翻查《通勝》，發現十月三日忌作樑，即係都唔係好日，反而十日就啱啦，無論係上樑、豎柱、拆卸或者動土皆宜。雖然我哋唔鼓吹迷信，不過為求心安都係小心為上好啲。

 

添馬艦新政府總部大樓只差頂部橫樑，特區政府押後上樑，莫非想擇個良辰吉日進行？

 

（資料圖片）

 

[attach]19553[/attach]